Asociación Nós Mesmas

Queda moito por facer para ser Nós Mesmas

Orgullo LGTB Vigo 2018

Nin disfóricas nin incongruentes.

Batukada feminista

Reivindicación

Visibilidade lésbica 2018

Bicada polas rúas do centro Vigo.

miércoles, 6 de octubre de 2021

Volta ao cole Curso 2021-2022!

 Coñece as novas propostas que o Equipo de Educación de Nós Mesmas ten preparadas para este novo curso escolar!

Desde Infantil a Formación Profesional, temos claro que a diversidade é un valor que debemos integrar con independencia da idade do noso alumnado, con estas propostas esperamos axudar ao profesorado na sensibilización da diversidade afectiva-sexual, de xénero e familiar e contra a discriminación.

Clica nas imaxes e entra no blog de educación e coñece as propostas desde 2021-2022:














Programa parcialmente subvencionado pola: 



martes, 7 de septiembre de 2021

Cineastas galegas en Vigo

 


Desde a Concellería de Igualdade do Concello de Vigo presentan este ciclo de cinema de cineastas galegas, con proxeccións de balde e debate posterior coas directoras.

Os 3 traballos merecen, e moito, a pena, pero tiramos polo que nos toca e queremos destacar e animarvos a acudir o día 22 de setembro ás 20h ao visionado de Persoas S.A. de Carmen Granxeiro e producido por Arelas, asociación de familias de menores trans, e que recolle unha diversa realidade máis alá do cisheteronormativo, unha historia colectiva de recordos, reflexións e amizades dun verán marcado pola pandemia. 





miércoles, 25 de agosto de 2021

Obradoiros Pensar o Sexo

 Convidámoste a participar no próximo obradoiro para despedir o verán!

Como cada ano, dende o servizo de atención psicolóxica de Nós Mesmas, organizamos un espazo para o encontro e o crecemento persoal. Desta volta trátase dun convite para pensar o sexo, reflexionar e compartir. Queremos con esta proposta achegar nocións e ideas dende unha educación sexual con sexoloxía que podan ser de utilidade para entendernos, vivir e convivir o máis agusto posible.

Un convite a explorar dende outras miradas o sexo, e isto vai de: identidades, desexos, relacións, proxectos de vida e de convivencia...

Un espazo para encontrarnos e entendernos, mover o corpo e animar as ideas.

Será os xoves días 9, 16, 23 e  30 de setembro, das 17.30 ás 20hs. O lugar está pendente de confirmar, será polo centro de Vigo.

Lembra que hai límite de prazas polo que se tes interese e curiosidade chámanos ou escríbenos para preguntar e inscribirte.

Tlf contacto 722286300

Correo nosmesmas@felgtb.org



 

 

lunes, 26 de julio de 2021

Voluntariado LGTBI+ xuvenil

 

 

O teu tempo e as túas capacidades son moi valiosas e útiles! 
Por iso animámoste a que te sumes ao proxecto de voluntariado xuvenil A mocidade en prol da diversidade!

Se tes entre 16 e 30 anos e queres invertir parte do teu tempo para loitar contra a LGBIfobia, para contribuir en por fin á violencia e a discriminación cara as persoas sexo-diversas e para sensibilizar e visibilizar a realidade LGTBI ante outra xente nova, INSCRÍBETE! 

Este programa, que se desenvolverá de mediados de agosto a outubro, permitirache gañar en coñecemento persoal, coñecer a máis xente nova LGTBI e pasalo ben! 

As accións a realizar serán as de difundir a realidade LGTBI a grupo de mocidade en situación de vulnerabilidade en toda a provincia de Pontevedra. 
Formaremos un pequeno equipo, que recibirá formación previa e estará coordinado pola persoa responsable do voluntariado, xuntes realizaredes diferentes accións de intervención educativa e de sensibilización.

Como voluntarie, contarás cun seguro de voluntariado que cubrirá a túa acción co que estarás protexide e participar non te suporá ningún gasto, xa que, cada día que participes, terás cuberto o desprazamento así como outros gastos que se puideran ocasionar. 

Inscríbete no seguinte formulario e porémonos en contacto contigo para informarche!



Este programa de voluntariado xuvenil está subvencionado pola:





jueves, 22 de julio de 2021

Ven merendar! próximo xoves 29 de xullo ás 19hs

"Ven merendar!"
 
un espazo no que coñecer-se dende a diversidade de experiencias e procesos identitarios relacionados coa transexualidade.

Se te atopas con líos en relación á identidade e en particular se sintes estar ou estás en situación de transexualidade e che presta coñecer a outras persoas en situación semellante escríbenos a este email ou chámanos ao 722 286 300
 
Será a próxima semana, o xoves 29 de xullo ás 19hs no parque Camilo José Cela, entre a rúa Pi y Margall e a rúa Conde Torrecedeira,
lembra avisarnos para contar contigo.

Un abrazo!


 


martes, 20 de julio de 2021

Denuncia aos Rexistros Civis por transfobia

 


As persoas trans ven vulnerados os seus dereitos para cambiar o DNI, 

 

[20/07/2021] As persoas trans seguen sometidas á vontade de quen as atende. A Asociación Nós Mesmas, colectivo feminista de defensa dos dereitos das mulleres LBT, denuncia ante a Valedoría do Pobo a forma de proceder transfóbica dos Rexistros Civís ante a solicitude de cambio da mención ao sexo do DNI.

 

No contexto actual no que constantemente vemos nos medios a loita incesante por unha lei trans que despatoloxice e respalde os dereitos que lles corresponden ás persoas trans, estas seguen enfrontándose, a diario, á situacións que vulneran, incluso, os escasos dereitos que están recollidos na lexislación.

 

"Nos últimos meses-- comenta Elisabet Pérez-- representante e educadora social en Nós Mesmas, recibimos varias solicitudes de apoio de mulleres trans que reciben citacións para seren recoñecidas polo médico forense para o cambio da mención ao sexo no seu DNI cando xa cumpren os requisitos establecidos na lei para realizar o cambio. Esta solicitude é totalmente arbitraria, dependendo unicamente da vontade da persoa responsable do Rexistro, e está a acontecer en varios Rexistro Civís de Pontevedra"

 

A lei actual é clara, patoloxizadora, establece que para o cambio á mención ao sexo, deberán aportar informe psicolóxico de disforia de xénero, estable e persistente no tempo e informe de tratamento médico, por doutor/a colexiado, que certifique que a persoa leva, mínimo, dous anos, con tratamento para adecuar as súas características físicas. 

 

Estes requisitos, denuncian desde Nós Mesmas, así como fan todas as entidades e colectivos LGTBI e trans, son patoloxizantes, ignoran a autodeterminación do xénero, poñendo en risco a saúde das persoas trans e imposibilitando a súa inserción social e laboral, de aí a urxencia de verse aprobada a Lei Integral Trans estatal que elimine estes requisitos arcaicos. 

 

"A pesar do cumprimento de estes requisitos--continúa Elisabet-- o Rexistro Civil de Vigo e de Ponteareas continúa a solicitar máis probas e, sen ningunha explicación nin xustificación legal, cita as persoas trans que solicitan esta modificación en medicina forense no IMELGA para que acredite a súa condición. Este trato é denigrante, vulnera todos os dereitos das persoas trans e as sitúa nunha situación de indefensión e desprotección máxima, xa que, de non acudir á cita en medicina forense, o cambio quedaría paralizado cando xa levan máis de dous anos esperando, con ansia, poder concluír este trámite, polo que non lles queda máis opción que asumir a transfobia institucional e ver vulnerados os seus dereitos e a súa dignidade."

 

Desde Nós Mesmas, despois de intentar cambiar esta situación mediando cos Rexistros Civís de Vigo e Ponteareas, sen éxito e no prazo tan corto de tempo antes das citas no IMELGA, presentan hoxe unha denuncia ante a Valedoría do Pobo que espera poña luz sobre unha situación máis de vulneración e discriminación transfóbica.


viernes, 9 de julio de 2021

O servizo de atención psicolóxica na prensa

 

O Servizo de atención psicoloxica comezou a andar fai catro anos, de forma gratuíta e desenvolvese entre os meses de maio e setembro, podes solicitar cita previa a través do correo nosmesmas@felgtb.org

Contar con atención psicolóxica para o colectivo LGTBI é unha necesidade que en Nós Mesmas temos presente desde fai moitos anos, unha atención de calidade, especializada en sexualidade e na atención á identidade, cercana, sen tempos de espera eternos e de balde.

Maila a súa necesidade, carecemos das posibilidades de manter o servizo profesionalizado todo o ano, polo que esta segue a ser unha necesidade vital para o colectivo LGTBI de toda a provincia polo que seguiremos traballando para conseguilo.

No ano 2020, este servizo deu atención a máis de 25 persoas, menores e adultxs lgtbi, familias e profesionais que precisaban apoio ou asesoramento. Se queres información sobre o mesmo, non dubides en contactarnos.




lunes, 5 de julio de 2021

Xustiza para Samuel

MANIFESTO CONCENTRACIÓN 5 DE XULLO 

XUSTIZA PARA SAMUEL

Fotografía na concentración de Vigo de AlberteBello

O pasado sábado ás 3 da madrugada un grupo de salvaxes deulle unha malleira ata a morte a Samuel na Coruña. Asasinárono brutalmente. Aínda que estamos agardando a que as investigacións avancen, non podemos ficar calades fronte á morte dunhe des noses.

Samuel era un mozo gay de 24 anos. Podería ter sido eu, poderías ter sido ti, ou calquera das persoas do colectivo LGBTIQ.

Tamén hai apenas unha semana, bateron nunha parella de homes nas rúas da Coruña e de non ser pola veciñanza, a malleira puido ir a máis.

Menos de 24 horas despois do asasinato de Samuel, tivo lugar en Compostela unha agresión a unha muller trans, agresión que podería ter rematado do mesmo xeito de non ser, de novo, pola intervención dunhas veciñas que a presenciaron e decidiron tomar parte.

Todo isto sen esquecer todas as atrocidades que sufreu o colectivo dende o comezo dos tempos; dende agresións e torturas a persoas en específico até os campos de concentración LGTBIQ, demandamos poñerlle fin á violencia.

A pesar do grande número de delitos de odio cara ao colectivo, estes vense invisibilizados pola nube de eufemismos e palabras tabú dos medios de comunicación, aos cales lles pregamos unha maior implicación na visibilización deste tipo de delitos.

Hoxe estamos aquí non pra pedir vinganza, senon XUSTIZA para que a súa morte non quede impune e se investigue ata o final o que pasou esa fatídica noite.

Non pedimos vinganza porque o noso colectivo, o colectivo LGBTIQ sempre estivo por riba do odio. O noso colectivo sempre loitou por acadar unha sociedade máis xusta, máis diversa e igualitaria, libre de todo odio ou violencia. O que vos pedimos, o que vos esiximos, é que tomedes parte, que non deixedes pasar a violencia que vedes acontecer perante vós porque “non vai convosco”. As nosas vidas dependen diso.

Hoxe, unha vaga de solidariedade e reivindicación percorre as rúas de todo o país, arroupadas por compañeiras máis alá das nosas fronteiras, para demandar o fin da violencia contra o noso colectivo, para esixir leis que garantan os nosos dereitos tanto na Galiza como no estado español. A Lei 2/2014, recortada polo Partido Popular e despoxada do carácter punitivo, de recursos, e de seguridade xurídica que garanta o seu cumprimento, é papel mollado que nos deixa completamente desprotexidas. Esiximos a gobernos e institucións o compromiso firme de loitar contra o odio LGBTIfóbico para que isto non volva acontecer nunca máis.

Os discursos de odio e a violencia non poden ter cabida na nosa sociedade. Os crimes de odio non ocorren no baleiro, senón nun contexto social que os permite e fomenta, e este contexto ten responsables políticos.

Despois de décadas de avance social, na actualidade volvemos ver como estes discursos de odio son auspiciados por partidos políticos que teñen representación institucional e que deberían ser ilegalizados. Discursos defendidos tamén por partidos supostamente deesquerdas e progresistas, pero que tiveron unha viraxe profundamente LGBTIfobica. A responsabilidade desta morte e todas as agresións que están a emerxer tamén é súa.

Por último, queremos facer un chamamento ao respecto e apoio polo loito da familia e amizades de Samuel… Samuel era unha persoa inocente, á cal lle roubaron a súa vida polo simple feito de ser. Non esqueceremos o acontecido, seguiremos nas rúas e faremos todo o preciso para que non volvan ocorrer semellantes acontecementos.

Xustiza para Samuel!!!

jueves, 3 de junio de 2021

Servizo de atención psicolóxica, de maio a setembro do 2021

 

Reabre o servizo de atención psicolóxica en Nós Mesmas!
Un espazo de seguridade, condifencialidade e aprendizaxe.
Un recurso gratuíto e aberto á comunidade.

Os mércores e xoves en horario de mañá e de tarde e os venres en horario de mañá. Durante os meses de maio, xuño, xullo, agosto e setembro.

Se sintes que precisas acompañamento porque estás a pasar un mal momento, atravesando algunha dificultade ou sentindo malestar, se precisas dun apoio para tomar decisións ou aclarar dúbidas e inquedanzas; se tes algún lío ou curiosidade relacionada coa sexualidade, coas identidades e coas relacións... podes contactar con nós para información e/ou para marcar unha cita, tamén realizamos atencións online.



Faladoiro con María Reimóndez sobre o libro Cobiza


 

María Reimóndez, muller activista, feminista, cooperante, comprometida coa terra, implicada coas persoas. No pasado mes de febreiro o seu libro Cobiza conseguiu o “1º Premio Literario Pinto e Maragota” do presente ano.

 

Elixir este libro como un dos actos protagonistas do Orgullo Crítico LGTBI+ 2021 foi un acto premeditado, feito a conciencia e con moita satisfacción persoal. Este acto está organizado pola Asociación Nós Mesmas e a Asociación Mulleres e Palabras e convidamos a quen queira participar a que se achegue ao MARCO o vindeiro 15 de xuño, ás 19:30h. As prazas serán limitadas ata completar aforo.

 

ENTREVISTA A MARÍA REIMÓNDEZ:

María, unha das formas que tes na loita contra as desigualdades é a túa

escrita, poderosa escrita que nos fai reflexionar sobre o presente, pero que nos amosa tamén un futuro cruel que temos que modificar entre todas as persoas. En Cobiza aparecen moitos personaxes, onde sempre podemos atopar similitudes persoais, e recolle, de forma contundente, as desigualdades actuais fomentadas polo capitalismo e o patriarcado.

-Para nós como lectoras é marabilloso o teu compromiso coa escrita pero e a ti, como xurde a implicación da escrita coas desigualdades? Fáiseche cómodo abordar estes temas nos teus libros ?


A escrita forma parte da vida, é un xeito de participar da vida colectiva como tantos outros (o traballo, os coidados, a presenza física...), polo tanto no meu caso, dado que a miña vida xira ao redor da reflexión e da acción con respecto a múltiples desigualdades, escribir deste xeito é só unha manifestación máis dese modo de vida. Creo firmemente que toda escrita é comprometida, o que pasa é que aquela que é comprometida co poder (patriarcal, cisheterosexual, branco, de clase media-alta, capacitista...) se presenta como “neutra” e a escrita que sacha na leira común no sentido contrario tende a presentarse como de menor calidade, “ideolóxica”, mesmo panfletaria. Esa dicotomía tan perniciosa é algo que procuro desmontar con cada texto que escribo.

-Vivimos nun momento onde os fascismos parece que queren rexurdir, un momento complicado, sobre todo porque parece que parte da cidadanía non é consciente do que pode suceder se non actuamos organizadamente. Moita xente pensa que o tema das desigualdades a nós non nos afecta ignorando as nosas iguais e semellantes, é fácil mirar para o outro lado mentres non afecte a miña contorna. No libro afrontas as desigualdades dun xeito colectivo, todo vale para que os dominantes manteñan o poder. Como podemos inverter esta ecuación ?

Non creo que eu teña unha resposta total a esta pregunta, quitando que en todo momento histórico hai sempre un tirapuxa entre quen constrúe e quen destrúe (ou entre o poder e o contrapoder, que diría Foucault). O importante é pensar de que lado nos poñemos cada día dende os actos máis pequenos no individual e sempre sachar en colectivo. O avance da extrema dereita é unha realidade que se fomenta sobre todo no discurso, por iso a escrita (literaria e de todo tipo) é tan importante. Non podemos permitir que sexan eles quen marquen as nosas prioridades políticas, os temas de debate e moito menos dar espazo a discursos abertamente racistas, xenófobos, tránsfobos, machistas... Mais, ao final, se eses discursos se toleran é porque non estamos indo á súa raíz. E a raíz é moito máis complexa ca a superficie porque implica que cada persoa e cada comunidade se teña que estar avaliando de forma crítica de xeito constante. Por dar algúns exemplos, no nacionalismo galego, do que me considero parte, hai unha necesidade urxente de revisar, xa non só o discurso patriarcal adquirido, senón tamén a visión acrítica que temos de sermos un “pobo oprimido” sen preguntar a quen oprimimos nós. Igualmente, dende os movementos LGBT occidentais por veces as reflexións teñen unha forte base colonial (somos nós quen imos iluminar a outras, cando o certo é que en todos os demais continentes a diversidade sexual e de xénero era a base social antes da colonización), ou tampouco se cuestionan ideas de “normalidade” que son problemáticas (a monogamia, as estruturas familiares, as inclusións e exclusións de certas categorías). Fronte a todo isto, eu parto dunha ética e pedagoxía feminista, que consiste en non conformarse con analizar a opresión, senón que busca analizar o privilexio que todas as persoas temos. E a partir de aí, darlle a volta, interrogar: que podo facer co privilexio que teño para o ben común? No meu caso, isto é algo que impulsa o privilexio que teño á hora de usar a voz pública como escritora.

-Aparte da calidade literaria a que nos tes acostumadas, entendemos que Cobiza é unha contribución moi importante á túa reflexión sobre a construción do sexo e do xénero, das novas identidades, das orientacións sexuais, dos coidados da terra, dos coidados ás persoas. Pensas que estes conceptos están chegando a cidadanía dun xeito natural? Non é máis fácil aplicar os sentimentos como ferramenta de traballo en contra das manipulacións das estruturas de poder?

Cobiza é un intento de tratar certas cuestións de forma complexa e interconectada. O que busca é provocar unha reflexión a partir da incomodidade (neste caso presentarnos un distópico mundo potencial se seguimos co rumbo que imos). Sempre digo que a incomodidade é o maior motor de cambio, porque só quen está incómoda ten interese en moverse e cambiar as cousas. Por iso escribo dende esa base. O que non concibo é unha separación da reflexión e da emocionalidade. Creo que esas separacións só son posibles na mente patriarcal occidental, tan influída polo cristianismo co seu afán de separar mente (elevada/masculina/branca) e corpo (sucio/feminino/racializado). Na escrita a reflexión e a emoción sempre van da man, por iso é unha ferramenta importante (como calquera ficción: o cinema, o teatro, os videoxogos, a danza...) para que a cidadanía reflexione e atope alternativas.

-Pensas que conquistar as diferentes igualdades reais no mundo realmente é unha novela de ciencia ficción ?

Non, é unha novela que escribimos cada día.

Grazas María, por ser, por estar, por participar nesa loita precisa que é a nosa.

Moitas grazas.

miércoles, 2 de junio de 2021

Programación Orgullo Crítico LGTBI+ Vigo 2021

Chega o mes do Orgullo Crítico LGTBI Vigo 2021!!!! 

O Orgullo Crítico que organizamos desde Nós Mesmas, recompila actos culturais e de sensibilización que reivindican e visibilizan a realidade LGTBI, e como non pode ser doutra forma, este ano centrámosnos en visibilizar a realidade das persoas trans e en reivindicar unha lei integral trans! 

2021 está sendo, ao igual que ano anterior, un ano compricado, con medidas sanitarias que preveen novos contaxios e que limitan as actividades, os aforos, os tempos...aínda así, non quixemos renunciar a seguir reivindicando unha data tan fundamental como é o Orgullo, por iso, presentamos a programación que con tanto amor e traballo organizamos para este ano: 


10/06 18.30h Pregón, Museo Marco (rúa)

10/06 19h Coloquio Movementos sociais ás marxes, con Abrir Fenda, Bloque Obreiro e Xacia Ceive de Sete Outeiros, Museo Marco (aforo limitado sen inscrición)

15/06 19.30h Faladoiro con Mª Reimondez sobre Cobiza, actividade coorganizada coa Asociacion Mulleres e Palabras, Museo Marco (aforo limitado sen inscrición)

19/06 19h Documental Vestida de azul e coloquio posterior cunha das protagonistas, Nacha La Poderosa, Auditorio Teis (aforo limitado sen inscrición)

22/06 19.30h Memorias da Galicia LGTBI con Eva Mejuto e Daniela Fernández, Museo Marco (aforo limitado sen inscrición)

25/06 19h Documental Noite Irisada e coloquio posterior con Nanina Santos, Xosé Buxán e Beatriz S. Briones; Museo Marco (aforo limitado sen inscrición)

26/06 11.30h Pedalada por unha cidade diversa e accesible (inscrición previa aquí)

27/06 12.30h Un día en familia, Monte do vixiador (inscrición previa aquí)

28/06 20h Manifestación "Os dereitos humanos non se negocian, lexíslanse: Lei Integral Trans Xa!" Saída de Praza dos Cabalos.

Peche do Orgullo, actuación Petra Porter


Para facer todo isto posible, precisamos de colaboración económica. 

Como todos os anos, presentamos o programa a subvención de Igualdade do Concello de Vigo, que esperemos financie unha pequena parte dos actos, a maiores, buscamos a cooperación doutras institucións que nos cedan espazos e contamos con merchandaising que podes facerte con el na nosa sede. 

Este ano, a maiores, contamos coa colaboración de Entrapolis para a venda de Entradas Fila 0. Esta entrada é unha compra simbólica, non reserva butaca, é unha doazón para colaborar coa organización do Orgullo, todos os actos organizados son gratuítos e abertos.


Coorganizado con: 


Coa colaboración de: 






Coa subvención de: 










lunes, 31 de mayo de 2021

Hemeroteca LGTBI+ online

É fundamental que coñezamos a memoria histórica do colectivo LGTBI+, saber de onde vimos, quen precedeu a nosa loita, que camiños abriron e cales seguen sendo as batallas que veñen de atrás

Nos seguintes enlaces podes atopar revistas e novas das décadas 90´s, 00´s e 10´s, cedidas por Susho Muiños e Esteban Souto, aos que lles agradecemos ternos cedido todo este material

Esperamos que, estes pequenos retazos de historia, sexan do teu interese!!!


Índice hemeroteca


Revistas:

-S`Homos 1                                                                               -CGC, CLI, CCGL 

-S`Homos 3                                                                               -ELAS, ALAS, ELES

-S`Homos 4                                                                               -Día Del Orgullo 1992                                

-S´Homos 5                                                                               -Enboga 1

-S´Homos 6                                                                               -Enboga 3

-S´Homos 7                                                                               -Enboga 4

-S´Homos 9                                                                               -As mas perralheiras 2

-S´Homos 11                                                                             -As mas perralheiras 1


Novas xornais: 

-1999

-2000

-2001

-2002





miércoles, 14 de abril de 2021

Servizo Orientación, formación e asesoramento social e laboral


Servicio de Orientación, Formación e Asesoramento é un servizo  especializado no colectivo de mulleres lesbianas, bisexuais e trans que cubre a provincia de Pontevedra.

Proporcionamos información, orientación e asesoramiento á ciudadanía LGTBI e achegados  (familias, profesionais, etc.) sobre os seus derechos, exercicio dos mesmos e recursos sociaies adecuados para resolver as súas necesidades.

O noso servizo conta coas seguintes características:

  • Servicio gratuito, profesionalizado e confidencial.
  • Acollida e información.
  • Atención e asesoramento social, derivación e acompañamento a recursos externos.
  • Atención individual ou familiar a personas del colectivo LGTBI, familiares ou entorno cercano.
  • Sensibilización e formación.
  • Orientación laboral a mulleres LBT.
  • Asesoramiento a profesionais de outros ámbitos que traballan en temática LGTBI  de forma puntual ou continuada.

Imprescindible cita previa, podes solicitala a través de:

E-mail: nosmesmas@felgtb.org

Teléfono e WhatsApp: +34 722 286 300 ou no +34 627 736 965




Servizo subvencionado por:



viernes, 5 de marzo de 2021

Peche do 2020, queres saber como nos foi?

 Pechamos un ano complicado, un ano que ninguén esperaba e no que moitas das persoas que forman parte do colectivo LGTBI viviron como unha dura experiencia, vendo aínda máis vulnerados os seus dereitos.

Como exercizo de transparencia e boas prácticas, deixamos aquí as memorias que recollen todo o traballado neste ano 2020 así como o resume de contas anuais. 



Memoria actividades 2020 e previsión actividades 2021

Contas anuais 2020